Philippians 1
14. . . . (πΌπ°π½π°π²πΉπ)ππ°π½π π±πππΈππ΄ πΉπ½ πππ°πΏπΎπΉπ½ π²π°πππ°πΏπ°π½π³π°π½π π±π°π½π³πΎππΌ πΌπ΄πΉπ½π°πΉπΌ πΌπ°πΉπ π²π°π³π°πΏπππ°π½ πΏπ½π°π²π°π½π³π°π½π π π°πΏππ³ π²πΏπ³πΉπ πππ³πΎπ°π½. 15 ππΏπΌπ°πΉ ππ°πΉπ·ππΉπ πΎπ°π· πΉπ½ π½π΄πΉπΈπΉπ πΎπ°π· π·π°πΉπ ππ°πΉπ, ππΏπΌπ°πΉ πΈπ°π½ πΉπ½ π²ππ³πΉπ π πΉπ»πΎπΉπ½π πππΉπππΏ πΌπ΄ππΎπ°π½π³, 16ππΏπΌπ°πΉ πΈπ°π½ πΏπ πππΉπ°πΈπ π°πΉ, π πΉππ°π½π³π°π½π πΈπ°ππ΄πΉ π³πΏ ππΏπ½πΎππ½π°πΉ π°πΉπ π°π²π²π΄π»πΎππ½π π²π°ππ°ππΉπΈπ πΉπΌ; 17πΉπΈ πΈπ°πΉπ΄πΉ πΏπ π·π°πΉππππ°πΉ πππΉπππΏ πΌπ΄ππΎπ°π½π³, π½πΉ ππ πΉπΊπ½π°π±π°, πΌπΏπ½π°π½π³π°π½π ππΉπΊ π°π²π»ππ½π πΏπππ°πΉππΎπ°π½ π±π°π½π³πΎππΌ πΌπ΄πΉπ½π°πΉπΌ. 18ππ° π°πΏπΊ? πΈπ°π½π³π΄πΉ π°π»π»π°πΉπΌ π·π°πΉπ³πΏπΌ, πΎπ°πΈπΈπ΄ πΉπ½πΉπ»ππ½ πΎπ°πΈπΈπ΄ ππΏπ½πΎπ°πΉ, πππΉπππΏπ πΌπ΄ππΎπ°π³π°; πΎπ°π· πΉπ½ πΈπ°πΌπΌπ° ππ°π²πΉπ½π, π°πΊπ΄πΉ πΎπ°π· ππ°π²πΉπ½ππ½ π³πΏπ²πΉπ½π½π°. 19πΏπ½ππ΄ π π°πΉπ π΄πΉ πΈπ°ππ° πΌπΉπ π²π°π²π°π²π²πΉπΈ π³πΏ π²π°π½πΉπππ°πΉ πΈπ°πΉππ· πΉπΆπ π°ππ° π±πΉπ³π° πΎπ°π· π°π½π³πππ°π»π³ π°π·πΌπΉπ½π πππΉπππ°πΏπ πΉπ΄ππΏπΉπ, 20π±πΉ πΏππ±π΄πΉππ½π°πΉ πΎπ°π· π π΄π½π°πΉ πΌπ΄πΉπ½π°πΉπΌ, πΏπ½ππ΄ π½πΉ πΉπ½ π π°πΉπ·ππ°πΉ π²π°π°πΉπ πΉππΊππΈπ π π°πΉππΈπ°, π°πΊ πΉπ½ π°π»π»π°πΉ πππ°πΏπ°πΉπ½π°πΉ, ππ π΄ ππΉπ½ππ΄πΉπ½π πΎπ°π· π½πΏ, πΌπΉπΊπΉπ»πΎπ°π³π° πππΉπππΏπ πΉπ½ π»π΄πΉπΊπ° πΌπ΄πΉπ½π°πΌπΌπ°, πΎπ°πΈπΈπ΄ πΈπ°πΉππ· π»πΉπ±π°πΉπ½ πΎπ°πΈπΈπ΄ πΈπ°πΉππ· π³π°πΏπΈπΏ. 21π°πΈπΈπ°π½ πΌπΉπ π»πΉπ±π°π½ πππΉπππΏπ πΉππ πΎπ°π· π²π°ππ πΉπ»ππ°π½ π²π°π π°πΏππΊπΉ. 22πΉπΈ πΎπ°π±π°πΉ π»πΉπ±π°π½ πΉπ½ π»π΄πΉπΊπ°, πΈπ°ππ° πΌπΉπ π°πΊππ°π½ π π°πΏππππ πΉπ πΉππ, πΎπ°π· ππ°πΈπ°π π π°π»πΎπ°πΏ π½πΉ πΊπ°π½π½. 23 π°πΈπΈπ°π½ π³πΉππ·π°π±π°πΉπΈπ πΏπ πΈπ°πΉπΌ ππ π°πΉπΌ: πΈπ°π½πΏπ· π»πΏπππΏ π·π°π±π°π½π³π π°π½π³π»π΄ππ½π°π½ πΎπ°π· πΌπΉπΈ πππΉπππ°πΏ π πΉππ°π½, πΏπ½π³ ππΉπ»πΏ πΌπ°πΉπ π±π°ππΉπΆπ πΉππ; 24π°πΈπΈπ°π½ π³πΏ π πΉππ°π½ πΉπ½ π»π΄πΉπΊπ° πΈπ°πΏπππππΆπ πΉπ½ πΉπΆπ π°ππ°. 25πΎπ°π· πΈπ°ππ° πππΉπ²π²π π°π±π° π π°πΉπ πΈπ°ππ΄πΉ π πΉππ° πΎπ°π· πΈπ°πΉππ·π πΉππ° π°π π°π»π»π°πΉπΌ πΉπΆπ πΉπ π³πΏ πΉπΆπ π°ππ°πΉ πππ°πΌπ²π°π·ππ°πΉ πΎπ°π· ππ°π·π΄π³π°πΉ π²π°π»π°πΏπ±π΄πΉπ½π°πΉπ πΉπΆπ π°ππ°πΉπΆππ, 26π΄πΉ πππππΏπ»πΉ πΉπΆπ π°ππ° π±πΉπ°πΏπΊπ½π°πΉ πΉπ½ πππΉπππ°πΏ πΉπ΄ππΏ πΉπ½ πΌπΉπ πΈπ°πΉππ· πΌπ΄πΉπ½π°π½π° π΅πΏπΌ π°ππππ° π³πΏ πΉπΆπ πΉπ. 27ππ΄π· [πΈπ°ππ°πΉπ½π΄πΉ] π π°πΉππΈπ°π±π° π°πΉπ π°π²π²π΄π»πΎππ½π πππΉπππ°πΏπ πΏππΌπΉππ°πΉπΈ, π΄πΉ πΎπ°πΈπΈπ΄ π΅πΉπΌπ°πΏ πΎπ°π· π²π°ππ°πΉππ°πΏ πΉπΆπ πΉπ, πΎπ°πΈπΈπ΄ π°π»πΎπ°πΈππ π²π°π·π°πΏππΎπ°πΏ π±πΉ πΉπΆπ πΉπ, πΈπ°ππ΄πΉ πππ°π½π³πΉπΈ πΉπ½ π°πΉπ½π°πΌπΌπ° π°π·πΌπΉπ½, π°πΉπ½π°πΉ ππ°πΉπ π°π»π°πΉ ππ°πΌπ°π½π° π°ππ±π°πΉπ³πΎπ°π½π³π°π½π π²π°π»π°πΏπ±π΄πΉπ½π°πΉ π°πΉπ π°π²π²π΄π»πΎππ½π, 28πΎπ°π· π½πΉ πΉπ½ π π°πΉπ·ππ°πΉ π°ππ°π²πΉπ³π°πΉ πππ°πΌ πΈπ°πΉπΌ π°π½π³π°πππ°πΈπΎπ°πΌ, πΈπ°ππ΄πΉ πΉππ πΉπΌ πΏπππ°πΉπΊπ½π΄πΉπ½π πππ°π»πΏπππ°πΉπ, πΉπΈ πΉπΆπ πΉπ π²π°π½πΉπππ°πΉπ, πΎπ°π· πΈπ°ππ° πππ°πΌ π²πΏπ³π°. 29πΉπΆπ πΉπ πππ°π²πΉπ±π°π½ πΉππ ππ°πΏπ πππΉπππΏ π½πΉ πΈπ°ππ°πΉπ½π΄πΉ π³πΏ πΉπΌπΌπ° π²π°π»π°πΏπ±πΎπ°π½, π°πΊ πΎπ°π· πΈπ°ππ° ππ°πΏπ πΉπ½π° π πΉπ½π½π°π½, 30πΈπ ππ°πΌππ½ π·π°πΉπππ π·π°π±π°π½π³π°π½π, πΈππ΄πΉ π²π°ππ°πΉππΉπΈ πΉπ½ πΌπΉπ πΎπ°π· π½πΏ π·π°πΏππ΄πΉπΈ πΉπ½ πΌπΉπ.
Copyright information for
Wulfila